• Xunta e representantes do sector rubrican a actualización deste acordo con horizonte ata 2030

O Clúster TIC Galicia participou hoxe na firma do novo Pacto Dixital entre a Xunta e representantes do sector tecnolóxico, nun acto celebrado no centro GaiásTech de Santiago de Compostela.

Este acordo supón a actualización do Pacto Dixital subscribido en 2013 e establece un novo marco de colaboración con horizonte ata 2030, orientado a reforzar a colaboración público-privada para avanzar cara a un modelo de desenvolvemento tecnolóxico sostible, inclusivo e centrado nas persoas, impulsar unha economía dixital e consolidar Galicia como un territorio innovador e competitivo.

Ao pacto adheríronse as principais compañías e entidades do ecosistema TIC galego, como o Centro Avanzado de Tecnoloxía (ATC) de Accenture, Altia, Coremain, DXC Technology, Gradiant, IBM, Inetum, Izertis, Minsait, NTT DATA, Oesía Networks, R, Orange, Plexus Tech, SATEC, Telefónica, Televés, Vodafone, Oracle Ibérica e INEO.

Entre as súas principais liñas de actuación atópanse acelerar a capacitación dixital da cidadanía, impulsar novas oportunidades de negocio para o sector TIC galego, promover unha contorna dixital segura e inclusivo e favorecer a adopción de tecnoloxías innovadoras que contribúan ao desenvolvemento económico e social da comunidade.

Durante o acto, o presidente do Clúster TIC Galicia, Antonio Rodríguez del Corral, destacou a importancia estratéxica deste pacto nun momento clave para o futuro tecnolóxico de Galicia, ás portas da aprobación do Plan Director da Industria das TIC.

Sinalou que a renovación do acordo, asinado inicialmente en 2013, “non pode ser máis oportuna e necesaria”, especialmente para o sector das tecnoloxías da información, baseado no talento humano e con capacidade para competir en Europa.

O máximo responsable da entidade puxo en valor o papel da intelixencia artificial como un novo aliado para acelerar a transformación dixital, especialmente cando está impulsada por profesionais especializados. Neste sentido, afirmou que Galicia conta cunha oportunidade histórica: dispoñer do talento, as empresas e as capacidades necesarias "para ter as mellor administracións dixital de Europa", apoiándose no potencial da IA open source.

Rodríguez del Corral subliñou tamén que "o Clúster TIC Galicia apoia firmemente este pacto" e lembrou as numerosas iniciativas xa en marcha e aliñadas cos seus obxectivos, como os programas "Que non léente, ti elixes", Tech Angels e Xuventude Mentoring, o Campus Dual TIC, a FP Dual Multiempresa, o Portelo único, o Centro de Servizos Avanzados da Cidade das TIC ou o proxecto CORTEX, unha cooperativa de intelixencia artificial para modelos e computación aplicada ao desenvolvemento de software.

O pacto tamén recolle liñas de actuación relacionadas coa capacitación dixital da cidadanía, a formación, o impulso do talento tecnolóxico, a promoción de vocacións STEM entre as mulleres, a implantación de TI nos diferentes sectores produtivos, a identificación de retos e oportunidades ou a dinamización de espazos de colaboración.

Neste sentido, o presidente do Clúster, incidiu en que "o talento TIC é a base de calquera avance tecnolóxico" e defendeu seguir reforzando a formación, adaptándoa aos novos retos que expón a intelixencia artificial e conectándoa coas necesidades das empresas a través de microcredenciales.

Sinalou, ademais, a necesidade de aproveitar ao máximo as novas infraestruturas dixitais que Europa está a financiar, como a futura factoría de intelixencia artificial do CESGA, que se situará no Biopolo de Sionlla, para convertelas en motores de crecemento económico para as empresas.