• O Colexio Profesional de Enxeñaría en Informática de Galicia outorgoulle o Premio Especial CPEIG-En memoria de Hernán Vila

José Manuel García Oya, socio director de Plexus Tech, recibiu o Premio Especial CPEIG-En memoria de Hernán Vila, no marco da XVIII Noite da Enxeñaría en Informática de Galicia, celebrada o pasado venres en Santiago de Compostela. Con este galardón, o Colexio Profesional de Enxeñaría en Informática de Galicia (CPEIG) recoñece a súa traxectoria profesional, estreitamente ligada á historia de Plexus Tech, e a súa contribución decisiva ao desenvolvemento do sector TIC galego.

O CPEIG outorgou tamén este galardón a José Valiño Blanco, director xeneral de IT, Información, Procesos e Operacións de ABANCA, na súa gala anual, marcada pola reflexión sobre a soberanía tecnolóxica, a innovación e o papel das persoas como elemento clave para construír o futuro dixital.

Desde a compañía agradecen o traballo e contribución de José Manuel García Oya á evolución de Plexus Tech ao longo de tantos anos, situándoo como un referente dentro e fóra da empresa, e destacando o seu papel fundamental no desenvolvemento do sector tecnolóxico galego.